揹 袋 語 錄 2 0 0 8

近日，香港地最新潮流，是全城熱賣一種超巨大型揹袋，其大的程度，以一般香港女性身型來說，袋的體積幾乎佔身體達四份一，很巨型。寫這篇文章的時候是 2008 年 4 月一 日，不知以後還有什麼隨身帶的物品會以大取勝？ 今時今日，手提電話已從以往愈細愈人人愛，轉為現在越巨型越多功能便愈值錢。新款手提電話功能超卓、3 G 、高解象鏡頭、自拍短片、各種彷電腦功能、還差點欠了防色狼的高壓電擊、或國防專用導彈發射裝置，正如隨身揹袋，原意是便攜日常小物件，但現在已變成出街有如返鄉下一樣，只欠了隨身被舖，隨時遠行。

揹袋係：


1. 唔知點解，隨身物由少量為主變為而家愈多愈好既。

2. 唔知點解，身邊有個袋，好似男人有春袋一樣重要既。

3. 又唔知點解，女人揹個大袋，緊要過自己有無走光既。

4. 好明顯，揹袋至目前為止，仍然係身份象徵之一。

5. 又好明顯，揹個袋出街，係心理上得到安全感重要原素之一。

6. 更加明顯，今時今日無個袋傍身，緊要過無帶錢咁既。

7. 非常明顯，一卡傍身已經過時，要一袋傍身至世界通行既。

8. 好奇怪，揹個大袋入舖頭，無乜人以為你想偷嘢既 。

9. 又好奇怪，無個袋揹住入舖頭，反而店員會認為你心懷不軌既。

10. 開始懷疑，揹咁大個袋，個袋會唔會拗出蟲蟲自己都唔知呢？

11. 開始懷疑，其實有無咁多嘢真係要帶出街既。

12. 女仔個袋，連 500 ML 蒸餾水都有，係咪要嚟幫男友 ( 救火 ) ？

13. 女仔個袋有幾十種護膚品乜乜物物，隨時可以當擺街邊檔套現既。

14. 有 d 男仔好鍾意幫女仔拎手袋，而家愈來愈辛苦喇。

15. 某程度上，女仔袋咁大，都可以當係保護自己個胸既盾牌。

16. 又某程度上，遲 d 可能要紅白藍返鄉下袋至出得街既。

17. 如果無錢買個 L.V 做招牌，買個巨袋頂住先啦。

18. 如果已經有個 L.V，可能都要整多個大袋，用嚟袋住個 L.V。

19. 以前 d 人戴金撈表示晒碼頭，而家係靠個大袋既。

20. 可能有朝一日，黑社會晒冷會變成晒袋既。

21. 又可能會有一日，以貌取人會變成以袋取人既。

22. 袋愈大愈好，正如第三世界地區人人要有 L.V 同樣道理。

23. 咁大個袋，分分鍾連個 BB 都可以袋埋，好方便既。

24. 無謂笑大陸厘返鄉下，因為香港人可能更似港燦出城。

25. 唔好奇怪，咁大個袋出街，一樣照問人要膠袋既。

26. 好彩香港唔可以買真槍，否則咁大個袋起碼袋十幾枝槍既。

27. 某程度上，揹個大袋都算係另類個人空間嚟既。

28. 又好大程度上，個大袋已經係自己另類地盤嚟既。

29. 可能有朝一日，唔係揹袋，而係人人要用手拉唊至合格既。

30. 更有可能，有朝一日出街同搬屋無乜分別既。

31. 直頭有可能，情侶有兩個大袋，方便遮住嚟…攪嘢既。

32. 揹個袋愈大，唔代表你口袋有錢既。



陳大文 作品