近期網誌簡介


2008年5月16日星期五

愛 情 搶 包 山 : 愚 笨 精 華 遊


男歡女愛,現代社會,香港雖不至於開放程度列為世界首位,但論男女追求,以獨立性和自由度,也不比西方國家為低,當然,在中國人社會文化上,香港人生活文化不能硬性和西方國度相比。但在香港,男女隨緣,成為愛情幸運兒,只要有心實行,總可如魚得水,除非大家不合眼緣,或天註定少了愛情原素,否則少見有亡命鴛鴦,或痛苦不能求得心儀愛侶。


不過,今時今日,仍有不少男女,基於千奇百怪原因而未能求得愛侶,奇趣之處並且父母或男女雙方門當互對問題,而註定有緣人往往因為自己愚昧,或嚴重缺乏生活智慧,幸運並非必然,正如註定可中六合彩,也要閣下動手去買上一票才能成其好事,若果笨得買了也掉了,多少幸運之神也於事無補。這道理簡單得無須多解釋。


我地又嚟睇睇最常見令男女有緣無份既人為因素,睇完可能令看倌嘔血。


第六位:《 先天性陰謀論


好多時候,就係自己對對方太多猜忌、太多顧忌、同埋太過【小心】,而令自己失去左好多嘢,將美事變成壞事。男對女或女對男有意思,或者更好既係雙方都合眼緣,本來好事,但自己成日以為【佢會唔會鍾意我架 ?】咁樣唸,估嚟估去,夕陽都西下喇,愈估就愈驚,最後縮沙。


好多人不肯相信自己既感覺,對自己無信心,又對人地存在【先天性陰謀論】,男女也有這現象,緣份並唔係萬能既,有緣份唔代表合埋眼就成事在天。



合眼緣未必可以成為情侶,但有啲特別感覺係自己知道既,除非係智力有問題。


第五位:《忽然愛情心戰室》


呢個現象,喺所謂既【寫字樓】職業層面上最常見。喺寫字樓文化裡,男士缺少左自己既思考能力,成日鍾意聽埋晒果啲所謂既【愛情至尊叻仔】屎橋老點。果啲自命情場叻仔,可能係扮嘢扮得好,講到似層層,用埋啲九唔搭八既屎橋嚟測試愛情,慘得過當事人深信不移,寧願信人地幾句戲話,而唔信自己既直覺,相反,女性世界都有呢類【三毫子一擔軍師】。



呢啲咁既軍師,本身可能就係愛情生活亂七八糟,正如一個炒股票輸多贏少既盲毛,仲去賴係德高望重成個權威咁去指導人地至富之道,你話好唔好笑?


第四位:《潮人把鬼精神領袖》


曲線咁推而廣之,喺另一層面,果啲愛情軍師,就好似市面上既半紅不黑廉價才女,呢班咁既【後現代無嘢撈把鬼潮女】,喺自我情場幻得幻失之餘,自我投射加上自我期望,去教人如何尋愛。或者,自己事業浮沉,但一大堆處世偉論,將自己失意既情緒,投射向其他人,期望人地都有自己特質。情況就等同一個【零胸】既排骨精女士教人如何豐胸,荒謬至極點。


第三位:《姊妹團實驗人辦理論》


喺女性世界裡,有一樣好似好有道理但又荒謬絕倫既,就係【姊妹團實驗人辦理論】。


香港女士好流行既,就係聽好多所謂【女同事】、【姊妹 friend】講好多理論,例如喺八掛雜誌由班妹妹仔編輯仔 junior 寫既乜乜【愛情漫步 one two three】、【時尚女性愛的戰場】之類【純粹靠估】既文章,於是一被姊妹問起,就即刻搬晒出嚟,偉論一番。



最常見就係姊妹團會認為全世界男人無個好人,通常一定會有【忽然人辦例子】,話【我呢,我個 friend friend 個同事呢,識得有個人咁架 】,我以前寫【港女】文章時,除左有好多女讀者 ( 正常有識之士 ) 認同港女既難頂外,持反對意見既,總會有幾個彈出嚟,實會話【我識得有個人,咁咁咁架,所以你錯囉】。



但當問下個例子詳情,就會同一時間可以同一個人幾個版本,總之一定有舉一反十、【好多男人係衰神】、【好多男人好恐怖】、【好多女人好慘】、【好多 friend 都係咁囉 】之類。


當然,更有更加多例子【忽然引證】 :【你而家個男友 / 老公 真係有問題架!】。


第二位 :《八婆系人型喇叭筒》


【寫字樓聖殿】裡面,總會有人型喇叭筒,喜歡戲劇化人地,令人尷尬。 男同事追女同事,容易被果班八婆人型唱到臭,如果女同事追男仔,又會當正睇日劇韓劇咁不斷代入假設,有咁肉酸唸到咁肉酸,有咁肉麻得咁肉麻,總之令人尷尷尬尬,阻人發達。


呢啲寫字樓文化,八婆喇叭團之中,梗會有一兩個【殿堂級德高望重雖然醜樣但好似好有腦】既中堅份子,出口成文,熟讀雜誌八掛新聞,行出嚟慘過香港小姐既【慧賢雅集】主席咁,對人評頭品足,喺大攪辦公室政治之餘,又係資深是非精,呢啲人唔死無用。


第一位:《 最緊要係我飛起人先!


呢樣嘢,男女都有,就係當求偶好似長洲大平清照搶包山咁,驚死蝕底,最緊要計算【自己飛人,唔係人飛我】既小家叔度心態。


先講男士,男追女,要有基本既男人風度,遇見合眼緣既女仔,唔係唸方法令人開心,而係以為自己好叻好醒荒死執輸咁,用好多古靈精怪方式測試女方鍾唔鍾意自己。老實講,正常男女首次約會,除非大家都抱住【出嚟玩 Sex & the City】既心態,否則正常男女社交,成日唸住驚被人飛,又要千方百計令自己【係我飛人先架,我 Win Win 架】 咁既態度,點能夠增進雙方良好印象呢?


女士們都一樣,唔合眼緣既大可唔應約,合心水既,就無謂一見面就即刻好似驗屍咁驗,男士一個動作一個表情都要尋找缺點,慘過信用卡積分優惠愈多愈好,令男方充滿壓力,女方自己又會覺得自己好似對住件垃圾,大家都唔好過。


好奇怪,【最緊要係我飛人先!】,呢種係好異常既心理分裂現象,既然又有興趣想發展愛情,但又要好虛幻咁要不斷邪魔化對方,呢種心態到頭來會令自己感覺自己永遠係悲劇中人,認為世界上無個好人,發掘人地芝麻綠豆缺點,自己好似贏左六合彩咁,相當變態。



陳大文 作品 © All Right Reserved



4 則留言:

** 飛雪素素 ** 說...

【最緊要係我飛人先!】嘅心態係好奇怪囉~
男人嚟講...眞係好弱小心靈feel 咁。 係好女人型。

卡臣 說...

brother MAN
你啲原創名詞:【愛情至尊叻仔】,【後現代無嘢撈把鬼潮女】、【時尚女性愛的戰場】
《八婆系人型喇叭筒》<---笑死人啦!!


第一位:《 最緊要係我飛起人先! 》
真係好中,男女都怕受傷害.
有人鐘意自己好過自己鐘意人
好似獵人的動物頭標本
點算有幾多人鐘意自己
但如果對方醜啲或條件差啲
又立即嗤之以鼻

女子喜歡男士,會俾機會男士或暗示
【陪我去邊..】
【我多咗張飛..】
【幫我整電腦..】
男士ok便應約
唔ok咪耍走

不過中心思想係:邊個行出第一步,邊個就唔韾香, 所以大家都等

仲有一點是自卑
嘩!她咁叻, 一定唔吼我啦
其實可能是自己估估吓

FISH 說...

其實怕受傷害, 都可以理解, 因為真係好痛.

當我係《八婆系人型喇叭筒》, 環繞我身邊的不少直接認識的單身女友, 都有過受傷的經驗: 有男友不忠, 有拖著十年不娶, 有轉愛旋即結婚; 而離婚的兩個女友, 一個是老公包二奶, 另一個玩到唔識返家.

有咁重既陰影, 有人可以再一鼓作氣再接再勵, 但唔少無論點開解, 都要數年時間療傷. 我一個朋友用了整整4年...

很多陰謀論, 不是先天性的; 很多計算和怕蝕抵, 也有其愛情歷史的傷痛源頭. 見過鬼都怕黑, 經歷地震的人夜半聽見少許異聲都會驚醒. 他們是可憐, 多於愚昧.

Clay 說...

個人最討厭【後現代無嘢撈把鬼潮女】泛濫現象,三個月出一本爛書,都唔可以叫書只係一堆廢紙,內容仲爛個tvb劇集,偏偏有好多OL中女甚至師奶仔都奉為圭臬。

而《八婆系人型喇叭筒》就係全世界充斥住架喇,永遠都有啲咁口臭既人,所以唔多唔少都要有抗衡閒言閒語既能力。