金光火鑽民主黨豪門宴‧地產巨頭一家親

Share

民主黨籌得破紀錄的一百八十萬元，三巨頭笑逐顏開。


民主黨黨慶晚宴，四叔的恒基兆業地產及旗下公司共買了三圍「鑽石席」，恒地的一圍由新任政治公關林旭華（右）做 host。


中委馮煒光自己買了四圍枱，又頻頻在拍賣中舉手，成為籌款冠軍。

民主黨晚宴由貌似鄧麗欣的「黨花」鄭莉莉做司儀，令來賓眼前一亮。她早前為「七一」T恤做model一炮而紅（右小圖）。


東周刊 372 期 2010-10-11 報道

民主黨揾銀破紀錄 「揼心口」第一功臣

民主黨上周五舉行「揼心口」大會，在大劉的新商場The One樓上的煌府酒家筵開五十幾圍（大部分是賣枱，每圍萬二至二萬），最後埋單執咗一百八十萬，破歷年紀錄，比舊年十五周年大慶多咗近倍，唔怪得幾個頭頭笑逐顏開。

這次晚宴有幾件事值得一講，當中有不少微言大義。首先，幾個大財團及商界組織都畀足面，紛紛慷慨解囊買枱，其中以四叔的恒地最不避嫌，打正招牌買了三圍（共六萬大元），恒地嗰圍由新任集團政治公關林旭華做host，棟個牌大大個字寫明「恒地」，其餘兩圍則由旗下煤氣公司買起，幾個高層都有出席，且豪擲八萬元拍買了兩箱有機紅酒。

另外，麗新由高層張寶華出面買咗一圍，港鐵同領匯亦開正牌頭，其他財團則用子公司科水，不想太張揚。商界老友講，以前都有捐少少，如今民主黨同阿爺有偈傾，商界就可以開正名捐多啲，希望日後可以有商有量。

至於民主黨內部，有個現象極得意，就係中央委員馮煒光自己買咗四圍「鑽石席」（每圍兩萬大元），宴請地區友好（他是南區區議員）、公關行家及政圈朋友，夠晒豪氣。他另外又打了幾間公司心口，加起來共籌得十幾皮，成為當晚籌款冠軍。

線人話，馮煒光在民主黨中層浮游多年，始終與立法會議席無緣，今次民主黨突破政改困局，佢老哥是推動者之一，故銳意乘勢殺上。他身負今年籌款重任，如果搞得好好睇睇，將對他再上層樓更有利，所以他瞓身力搞，不惜自己掏埋荷包。

馮老兄多年前創辦公關公司，搞得有聲有色，年多前將公司賣給美資集團，搵咗一大筆，出錢出力絕對冇問題。線人指，他今趟應該上位有望，因民主黨可能新增一個副主席位，留給後生一族，馮老兄年紀唔大，坐此位的機會唔細。

當晚華叔帶病到場，受一眾黨員簇擁，盡顯幕後超級大佬的氣派。反而民主黨的創黨主席李柱銘，全不見影，擺明道不同不相為謀，無謂嚟攞景面左左。

紅色小百合做司儀 「黨花」艷光四射

今次民主黨黨慶，一開場就見到一位着紅色晚禮服的靚女行上台做MC，艷光四射令眾來賓眼前一亮。本刊記者向黨內老友打聽，得知這名靚女原來是民主黨黨員，名叫鄭莉莉，因洋名Lily，故有「小百合」之稱，她幾個月前參加民主黨集會企過出台，即引起網民注意，說她似鄧麗欣，張相迅速流傳。

這位「黨花」在某公營機構任職，在黨內不算活躍，幾個月前范國威組織七一遊行，設計一款T恤，搵咗「小百合」做model，才開始竄紅。她月前在新界西葵青一帶做地區義工，今年個黨找她做大會司儀，睇嚟仲有機會上位。