近期網誌簡介

2007年11月13日星期二

[ 亞里巴巴1688 ] 語錄 2007

全城和應,中國無得頂之超時代、改善人民生活、人類知慧之大成、可歌可泣、驚天地泣鬼神、七個一皮、中國之光、香港之榮、福佳始終靠佢...

各位觀眾,香港回歸十周年、愛國情懷;紅籌高峰有你 ~ 我們齊彈起拍掌歡迎:

[ 亞里媽媽 # 1688 ] I PO 掛牌 $ 13.5 ,每手 500 股,首日掛牌兩小時內爆升至 $39 ! 升幅達 192% !

睇到呢度,大家係咪好興奮咁呢,唔緊要,係正常既。如果閣下係 $ 39 / $ 39.5 放左,恭喜你,你已經賺左 $ 13000 ,用 $ IPO 價 $ 6750 賺左本金既兩倍,足可以去楊貫一果間阿一鮑魚食番 ( 一隻 ) 極級吉品鮑。

好喇,講到呢度,我想問問大家,喂本身來講,你地知唔知 [ 亞里媽媽 ] 其實係一間咩公司企業咁呢?


唔係講笑,真人真事!我去銀行攪支票簿,聽到係銀行內股票機房仔既一眾香港動力股民,或在超市 、街頭巷尾等等聽到的香港新晉熱血少壯派股市才俊 , [ 亞里媽媽 ] 有不同 ( 版本 ) :包括:.......

  1. 係一間公司o黎 囉 ~
  2. 好似係大陸既,有鬼佬話事架
  3. 好似係攪電影既,係咪有套新戲叫 亞里巴巴呀 ?
  4. 1688 ! 1688 !呢個 (林巴) 好意頭呀!一定係好野 o黎
  5. 我個仔話呢......係咩咩 I T 喎,好似係電話果 d 架
  6. 係一間跨國既大型電訊公司來既
  7. 都係一間生產手提電話既廠來既,好似 [ 樂基亞 ] 咁囉
  8. 唔知呀,1688 丫嘛 ! 一路發一路發呀 ,好易記架 !
  9. 啊.....我個女話呢 .... 係果 d 咩野網站喎 ,網站咩來架 ?
  10. 我個仔呀 , d 大學同學話呢,要追架,佢地個個都買左喇
  11. 亞里巴巴 ? 好似係做 波鞋丫嘩 ?
  12. 亞里巴巴 ,好似中海油咁囉 ,好勁架 !
  13. 我親戚話呢,抽唔到呢,$ 38 蚊追喎
  14. 亞里巴巴 ,係咪好似 [ 星巴克 ] 咁樣架,唔知呀,我問我個仔都唔知!
  15. 我知喇 !係新上市既 !無錯,係新上市既!
  16. 回歸十周年祖國大禮丫嘛 ,一定惦既 !
  17. 我個仔果班大學同學呀,我個仔讀大學架,佢地話呢,係大公司啦總之...
  18. 陳永陸呢,亞陸叔呀,佢話好架,好架,買喇、買喇...
  19. 亞里巴巴?係咪好似我個仔用緊既乜乜寬頻果類野呀?
  20. 快 d 買亞里巴巴呀! 聽人講話遲 d 呢,會係由佢供應香港 d 電訊架喇 !
  21. 我老公呢,佢叫我升得緊要唔好買喎,嘻! 我用私己錢買咪得囉 ~
  22. 喂喂 !而家跌到 $ 27 蚊呀,點呀?入貨掃佢啦! 個個都買喇
  23. ( 銀行內 ) 亞小姐呀,同我買........買果隻咩...咩丫,咩巴巴果隻呀,唔該.
  24. ( 超市內 ) 喂!衰鬼!亞張太何太陳太佢地話買左喇,係咩林巴話 ?16 咩話 ?
  25. 啊~ ,阿里巴巴丫嘛,我知 ~ 係 [ 雅虎 ] 分公司丫嘛,我知架,一早知啦
  26. 我個女呢,佢有果 d 乜乜網上拍賣喎,好似亞女話都係果 d 野囉
  27. 亞里巴巴 ?今年先有之嘛 !以前都無聽過既 ~ 總之係電腦果 d 野啦
  28. 招股書 ?唔知喎 ,不嬲無睇架啦 ~ 睇來做乜呀 ?
  29. ( 超市內 小女孩 ) 爸爸,爸爸 ,我要亞里巴巴呀 ,爸爸 ~
  30. ( 街市內 ) 喂, d 蝦靚呀,喂,你買左亞里巴巴未呀?
  31. 老公!聽日去探亞爸,佢叫我地去追番亞里巴巴呀 ~
  32. 喂,陳大文!你有無抽亞里巴巴呀? 一齊追啦! $ 38 蚊咋而家 ~

..................

我寫這篇網誌時,我正在聽 林子祥 既 [ 亞里巴巴 ] .......

chan tai man

沒有留言: