愛 情 搶 包 山 ： 離 婚 十 大 理 由

Share

近年來，香港除了眾多社會問題，包括貧富懸殊、就業問題、還有教育等等千奇百怪既所謂【國際哎吔動感都會】本來不應存在既問題外，當局仲有一項感到頭痛的，就是本港離婚數字持續上升。唔係無人結婚，相反，係有好多人願意去結婚，但婚姻關系卻不能持之恆久，三分鐘熱度就要鬧離婚。律師行少咗樓宇買賣既【肥仔水】生意，都可以幫人攪離婚。多人結婚，但多人離婚，究竟是攪乜鬼？

而家我地睇睇以本港實際情況來談談：點解你會離婚。

第十位：《離過婚既女人至係好嘢》

唔知從幾時開始，或者被市面上，果班自己婚姻事業皆失意既精神分裂兼潮童三毫子一擔才女偉論驅使，漸漸鼓吹一種所謂【結左婚，但我仲好惦既！】咁既觀念，以貫徹一派【離左婚當堂正晒！】既歪理，認為一個女人，結左婚等於同落地獄或者同死左無分別，於是要肯定自己其實仲好有魅力，而肯定既方式，就係要建基於【離左婚個人都唔同晒】！

第九位：《離婚 OK Fine 、我係Cosmo Lady》

香港人呢，好受潮流尤其係受電視劇劇情影響，例如見到有套美國劇【 Sex & the City】，就真係以為好 Sex 同埋一定係 City ，即係話一個人生活要好似劇中主角咁精彩，行出街一定個個款似 Model ，就算連公司個打雜，都要好似 Tom Curse 咁有情調，時時 Sex、個個都似 Cosmo Lady 。

第八位：《點解我唔係名媛既？》

在八婆雜誌裡面，其中一版最多人卜倒去睇既，就係【 Ball 場版】。如果以生態角度去睇 Ball 場版，好奇怪，得罪講句，真係好多闊太或所謂【名媛】，講得上靚，唔好話靚，就算叫做【似番個人樣】既，真係寥寥可數。甚至有唔少中女闊太，化妝化到似做大戲咁，周身肉或者三寸釘，又要著住件【設計俾 Model 著】既名貴禮服，有 d 仲幾丫歲人都要 【Bid】條巨型八字胸兼 A Cup 既乳溝出嚟，情況十分恐怖，真係肉麻當有趣。所以呢，好多結左婚既 OL ，見到這班 Ball 場地靈人傑，就會認為【喂，我個款好過佢地多多聲啦！】；自己漸漸產生自己為何不是名媛既自卑，心理唔平衡。

第七位：《老公無樣好，理想達不到！》

人有時好奇怪，明明自己碗飯同人地一樣，甚至大碗過人，但都會認為隔離飯香。又好精神分裂地，明明個男仔自己鍾意至會嫁佢，但一結左婚，就會用盡所有精力去尋找老公既所有缺點，情況就好似鬥智遊戲咁，搵到老公愈多缺點，就會有獎金咁。傳統智慧話俾我地聽，結婚關系要靠雙方維持同體諒，但好多香港女士都鍾意玩呢種鬥智遊戲。

第六位：《結婚 = 脫貧唯一方法》

有好多女仔，以香港情況較為嚴重，就係真心相信結婚係令自己即時成為大家閏秀既唯一途徑。不過，可能香港女仔真係太誠意相信電視台同八掛雜誌既吹水，加上太多自認有才華既後現代潮女吹捧，好多潮女本身無乜料，但追隨港式 Hello Kitty 潮女文化，於是大力吹噓要有非凡生活品味，溝仔要才俊，不嫁【財子】誓不為人。於是好多女仔就會唸：嘩我身份證都係 Female ，我都係徐子琪喎！咁唸就死得人多。

第五位：《抗拒做愛心態》

香港地光怪陸離，中式古法智慧教導女孩子，嫁左老公係會【蝕底左】既，而亞媽教女，或者社會風氣長久影響下，女性都一直認為【我同你做愛，係我俾你！】咁既老闆與下屬既異常關系。當然喺做愛過程中，係女方認為【係我俾你乜乜既】，男人同女人做愛係【賺到笑】，根本唔考慮男女做愛過程既互動歡樂，夫妻關系又出現缺陷。

第四位：《我好西化，我覺得乜都唔好》

喺【港式 Hello Kitty 潮女病毒】盛行後，今時今日潮女偉論層次已經唔再係一味罵男人，而家好多可能讀過下乜乜學士既潮女，都加入精神分裂戰圈，扭曲兩性關系用好多美化既言詞，並且聽落好似真係好有道理。例如標榜現代女性應該好西化，而西化既定義，就係買本自己唔會睇既高深外國真正才女既厚書帶喺身、飲下【娜星巴乞】【拿鐵】咖啡、上 LKF 講幾句半鹹淡港式英文、大聲哈哈笑好係豪邁，就認為咁樣叫西化。對男士要求高深莫測，例如鬼佬鹹濕叫 ( OPEN ) ，香港男士望兩眼就叫 【 很淫】；香港男士要無限 Gentleman ，話之你無厘頭打兩巴都要識得笑。

第三位：《買樓要會所，我係有錢人！》

香港地，結婚第一件事要考慮既，唔係第時個細路供書教學，而係要先攪惦買樓供樓問題。唔少女仔對睇樓係好簡單，有會所、個屋宛個名夠型夠勁夠貴族就得喇。例如：乜乜豪庭、乜乜一號 (可能只係一條爛鬼小街 ) 、乜乜灣物物灣、乜乜山頂宮殿 (可能喺公屋隔離又叫星級豪宅 ) 。發展商最識捉呢種新婚女士白鴿眼心理，價錢有咁高得咁高，總之要討好女士們既【我係名媛】心態，兩公婆買左之後唔開心，供貴樓供餐死，無晒錢去生活享受，但唔買貴族 Feel 既樓又唔肯嫁，死未。

第二位：《生仔係好 Out 既！》

好多女仔，真心相信廣告裡面既靚女 Model 真係一粒瑕疵都無，唔明白其實係電腦執出嚟既，而且好荒謬又自我醜化地認為，結婚生左仔，以【女人唔好蝕底】既標準，就驚日後搵到個仲勁既新男伴，嘩買大送細拖住件細路好唔惦，因為太多女士認為結婚係【我蝕俾你，我本來嫁得仲好架！】，話之自己咩樣，都以為自己係陳法拉或者 Anna ‧R ，結左婚成日唸後悔，自尋煩惱。

仲有一樣就係OL 自我崇拜 ，認為一生左仔就即刻變為師奶，會全無魅力，點解？ 之前都話，香港式女士總認為自己一定可以嫁極級富豪，以為做份幾千銀 OL 就係女強人。

第一位：《 你愛唔愛我 ？》

香港式女性思維，好多時候係建基於肉麻當有趣既愛智哎吔鬥智式既陰謀論上，成日探索老公係咪天天愛我多一些，情況就同【中學生應否談戀愛】多餘一樣。日日測試、日日猜忌、時時刻刻要老公好似玩神打標童上身咁，大聲喊口號【我愛妳！我真係好愛妳！我今日又愛多 d 妳！】，你估示威咩，駛唔駛拉埋 Banner 雞乸咁大隻字寫【 You are the BEST！Wo-Ahh You are the Best ！】咁呢？ 只要見個老公同其他女士講幾句嘢，就成日以為佢地一定有路，咁樣陰謀心態，夫妻點會和諧呢？

陳大文 作品 © All Right Reserved