愛 情 搶 包 山 ： 十 大 追 女 仔 唔 work 方 法

Share

相信很多男士都非常有興趣想知道追女仔既必殺技，例如乜乜【愛情殺手諫】、【追女秘訣 Step by Step】之類，期望以最有效既方法，去對心儀女士展開最有力既追求，聽落無得頂，但做落就俾人炳。所謂【秘訣】，真係講就天下無敵，但係咪真係咁犀利，似乎無乜人認真研究過。

所以，我不如講下一啲好多男士認為【好 work 】但其實唔惦 既方法，唔少男士成日唔明白點解啲女仔見到你就搵路走。原來，唔係自己樣衰累事，亦唔係唔夠才俊，又唔關錢既問題，而係用錯方法。只要細心分析，加上配合現今社會形態，原來聽落就好似好得，但實際上可能累死人。

第一位：《 結他情懷浪子 feel 》

好多男士以為今時今日，仲攪笑到好似七十年代許冠傑咁，拎個爛鬼結他，彈兩手歌仔，好似好浪漫，又以為咁樣好浪子好藝術。男人成日以為【浪子 feel】就係女士至愛，但年代不同，唔好再天真好傻咁以為學兩手結他，好有品味咁向女仔彈隻歌，真係無人啋你，仲覺得你好幼稚，更加唔好妄想到【一曲定情】，以免被人笑完仲唱到你瘀。

第二位： 《我好勤力！我係好仔！》

Come On ！ Babe ！ 各位 Gentleman 們，今時今日，你強調自己好勤力，不如做隻牛吧！唔好話自己好勤力好踏實，你勤力係你既事，自己享受勤力吧。喺香港地，你勤力一股作氣，女仔會以為你根本無料，無料唯有靠舖牛力，咁勤力去耕田咩。 不如學下金融方面既知識，理財學問，識得為自己打算，用較少既力量可以滾雪球令自己享福，女仔就認為你有腦。香港地呢，有力唔得既，要有腦。

第三位：《 踩靚女明星、妳最好既！ 》

有好多男士以為，對一啲靚女有身材既勁女明星彈到一蚊唔值，以為咁樣就突顯自己好清高，例如話：【車！ 梁洛思個樣唔靚嗟！我覺得好 cheap 囉 ！跟有錢佬之嘛！】，又同時讚心儀女仔又好學問又乜乜又七七。你唔好以為隨便踩真正靚女明星，就以為女仔一定 Buy ，呢啲動作只會顯出你十分扮嘢，都幾屎忽鬼。靚女明星，靚，自然有人地既價值，唔駛你地呢啲小男人去道德批判，慘得過人地靚到暈，你都追唔到，兩個世界。而你又未必清楚女仔可能心裡【暗地崇拜】果啲靚女星，大佬可能瘦身化妝著衫，都係學靚女星架！

第四位：《 我好慳家、儲蓄可以致富》

唔好意思，有咁既唸法既男士，請你快啲去 I F C 跳樓吧！ 而家香港地，儲蓄一定唔可以致富，你睇下一蚊一蚊咁儲，銀行都收 Service Charge 喎，阿 Sir 。

慳家？你估攪希望工程？ 而家做鄉下難民？ 咁慳家，即係跟你都無啖好食，莫講話享受，做你女友或你老婆，乜都唸慳慳慳！ 慳嚟放落棺材咩。 唔好以為吹噓自己慳家好仔就討得女士歡心，慳家？ 慳啲啦。

第五位：《高談狗屁政治》

如果你係新聞從業員，仲要係做港聞、或真係跑政治新聞既， OK 你講政治高論係正常，但不過呢，對女仔，講政治唔係代表你有料，而係悶蛋。就算大家都係跑新聞既男女，追同行，都免談太多時事政治，大佬你悶唔悶啲呢？

若果係一般人，追女仔唔該、 please ，唔好係唔係都講咁多政治，真係嚇怕人。你以為自己好有料？不如聽評論員講啦，駛你講？唔通你吹水吹得好過果班撈得起既評論員麼？自己唸唸啦。

第六位：《不如一齊去映相丫！》

喂大佬！今時今日，用相機去討女仔歡心去映相？陳冠希呀？如果係靚女呢，恭喜你，可能人地真係樂意俾你映。只不過，如果係平凡女仔，人地沖涼時照鏡都知自己【 睇落唔係好得喎…】，仲要人去攪一大輪化妝襯好套衫俾你映，仲有，你自問係咪技術好，費事本來已經唔係靚女，仲映得有咁衰得咁衰，人地女仔真係會對住自己堆相都食唔落飯，自己又唸下吧。

第七位：《我最憎啲人用 L.V ！》

你唔鍾意，係你閣下既事，唔駛用自己把衰口去強調。女仔好得意既，就算有個女仔真係唔鍾意用名牌，或者真係好憎名牌例如 L.V 乜乜 Gucci 等，人地唔用，唔駛你嚟評價，更加唔駛由你去反名牌。

你反名牌唔代表你好出塵。女人心態呢，係咁既，自己即使唔會崇拜名牌，但個男既一口話名牌係垃圾，即係你自己買唔起就買唔起啦，呢啲只係買唔起既道德借口，唔需要由男人去踩低名牌。

第八位：《妳食乜我食乜，You go ，I go ！》

咁人地個女仔月經來你係咪又【You go I go】咁呢又？ 有啲主見，好多香港女仔好醒目，本身已經好有 talent ，亦好有思想，作為時代新女性，期望個男伴能力起碼同自己相若，甚至高於自己，咁至有信心覺得【 呢條友惦！】。

男人，雖則唔應該乜都自作主張，但又唔好似隻跟尾狗，人地乜乜你又乜乜，應聲蟲咩？寵物男對於有質素既女士嚟講，係唔 work 架。例如簡單到食飯，女既食乜，你自己揀自己口味得喇，咁唔通人地瘦身你又哈哈笑陪一份咩。

第九位：《 唔望其他女性，心中只有你！》

唔好意思，處世哲學裡面，我地應該有智慧懂得欣賞多元事物，唔好以為好似革命軍咁一心向妳就覺得好巴閉。當然我又唔係叫你好似色魔，見其他女仔就好似餓左三日三夜咁，而係見到其他靚女，望兩眼咪望囉。

男人，開懷啲、豪邁啲，有番少少男人風格，見靚女欣賞一下，又唔係強姦人，唔係罪嚟。如果你遇到個女仔係屬於皇太后要你做跟班，咁你都應該唸下啦係咪？ 女人有時好得意，明明知你望其他靚女，好似心裡酸酸地，但又會認為你至係正常男人既，觀音兵唔係好過癮架，唔一定女士至愛既。

第十位： 《我有個理想…》

而家唔係小學生作文題，唔該、多謝合作，請分析你現有既籌碼，唔好乜都談理想。理想？你就想！

香港女仔，我唔覺得個個係【港女】，我亦唔認為我完全對【港女】心態一無所知，但好多事情，我反而嘗試去體諒佢地。女人希望個男人有能力、就算唔係照顧自己全部，都起碼唔好累街坊。乜乜理想你自己慢慢唸努力實踐吧！唔好日日好似懷才不遇，你好有才咩？你以為你係係邊位呀？！ 你好多理想但今個月卡數仲要唸計仔債務重組，理乜嘢想丫，評估一下自己真正才能，實實際際，真正表現到俾個女仔知道你有能力。我相信唔少女士其實唔係要求你識飛咁叻，但【我有理想】，收嗲啦。

陳大文 作品 © All Right Reserved