近期網誌簡介


2008年4月6日星期日

【 偽 人 】語 錄 2 0 0 8

2008 年,踏入春天香港已諸多事發,下次和大家談談民生方面在近日遇到的問題,今次先來一個( 回帶 ) ,和大家說說關於娛樂圈光怪陸離事。



年初,藝人陳冠希風頭一時無兩,他引起的艷照風波,涉及香港動感之都回歸後現代港人愛戴的一眾女藝人。這些涉事的高等華人女偶像,包括平日以純情潔白小乖乖的人間天使美女。艷照事件一出,有女藝人以【好天真好傻】等金句作為解釋,以慰解廣大追星者的失落,也有不少市民,認為藝人表面純潔,但表裡不一,是虛偽,並形容為【 偽人 】。



藝人被喻為【 偽人 】,是香港所謂娛樂圈的一場笑話,雖然不少市民已明白,本港演藝圈本質上已相當胡鬧。然而,藝人艷照事件,再加上警方對捉拿發放艷照者的操手,更為人疚病。種種事件如之前的富商超速駕駛鐳射槍爭拗案,富商以財力聘請頂級大律師為自己解圍,曲線地令小市民認為,只要有錢便萬事皆能,公理法治備受質疑。



究竟藝人,從事娛樂界是否個個虛偽,人人標準不同,不過,且讓我們看看何謂【 偽人 】。



偽人係:


1. 公道咁講,虛偽其實各行各業都有既。

2. 又公道講句,其實唔係個個藝人都咁虛偽既。

3. 不過公道 d 咁睇,唔虛偽根本做唔到娛圈既。

4. 話時話,好多藝人真係當觀眾係傻既。

5. 話時話,好多藝人真係扮嘢扮到過晒龍既。

6. 話時話,藝人 = 偽人,何嘗唔係娛樂公司攪出嚟架?

7. 不吐不快,有 d 成卅幾歲男星仲扮天真無牙。

8. 不吐不快,有 d 偽人真心相信自己係純潔天使。

9. 不吐不快,好多藝人真係以為自己一定會紅。

10. 不吐不快,好多偽人表面正義,但仲衰過古惑仔。

11. 不吐不快,影壇大亞哥教人愛妻但自己有二奶既。

12. 不吐不快,交通安全大使但自己魯莽撞車既。

13. 不吐不快,話靠實力其實日日做三陪小姐既。

14. 好想講,娛樂公司無乜邊間係真係做娛樂既。

15. 好想講,好多娛樂公司老細,都唔係好人嚟既。

16. 好想講,好多人話娛樂公司背後自己經營老翻既。

17. 偽人自己做乜就話好,但市民做乜就要仁義道德既。

18. 偽人成日話自己大方,但個個日日爭住鬥氣既。

19. 偽人係好識得適當時候出嚟做道德代表既。

20. 偽人又係好鍾意自己話自己乜都唔知既。

21. 偽人更加係不分男女,男藝人有時仲衰過女既。

22. 偽人好虛偽,但似乎觀眾都好多係傻既。

23. 偽人好虛偽,但好多觀眾仲以為佢地係人民典範嚟既。

24. 偽人好虛偽,但觀眾又慘得過繼續捧佢地既。

25. 好多時,偽人對好多問題都無立場既。

26. 又好多時,偽人好鍾意左右逢源,只求自保既。

27. 唔知點解,真係無乜邊個香港藝人係無咁【偽】既。

28. 唔知點解,偽人好多個都話自己會睇 Art Film 既。

29. 更無得解,偽人點解咁橋,成日都會走光既。

30. 偽人自己走光話好慘,但日日露乳溝既。

31. 偽人話遊戲節目好委屈,但個個爭住上既。

32. 偽人可以逗份雞碎咁多糧,但可以【忽然】買豪宅既。

33. 偽人成日以為中國至係唯一市場嚟既。

34. 偽人成日以為個個香港藝人大陸仔都咁鍾意既。

35. 成日夜蒲,但成日教青少年唔好夜遊既。

36. 成日教人唔好濫藥,但結果自己斷正既。

37. 成日批評人唔識音樂,但自己唱到走晒音既。

38. 偽人歌手如果無左電腦效果,唱歌同鬼叫無乜分別既。

39. 偽人如果唔做多d 代言人,真係乞米既。

40. 好明顯,今時今日藝人已經同演藝無乜關系喇。

41. 直頭好明顯,無乜人睇港產片係可以理解既。

42. 香港娛圈壟斷程度,同集團超市幾乎一樣既。

43. 咁多偽人話做得好委屈,咁唔好做啦笨?

44. 【好天真好傻】,講呢句果位,真係好天真兼夾傻。



陳大文 作品

6 則留言:

卡臣 說...

寫得好啜核!!
會心微笑!

電影叫"夢工場"
製造一個夢, 幻象俾消費者.
偽人都係販賣Glamour俾觀眾,

食煙嘅扮環保
話30歲前唔失身(araon kwok)
一roll機好親民,鏡頭後對fans立即黑面,
關心世界貧窮, 背後自己浪費揮霍

唔好怪佢地, 怪自己一廂情願
信佢地係完美

ps:你創作力真勁!日日有新野上!

陳大文部落 說...

香港地,老實講,香港所謂電影業,只係由一班黑社會 + 爛鬼 + 古惑仔 + 爛演員 ( 只有小部分係好 ) + 代言人識撈快錢文化 ,而結合既垃圾 Fusion。


你睇下班偽人,日日拍丸、夜遊人、口爆 Line 西既潮童,日日扮道德超人。


古巨基,同我一樣咁大架喇 ( 我指年紀~),仲日日扮天真無牙 Feel ....傻傻下咁既眼神...



PS : 其實我係慣左,我寫野唔駛點唸,腦裡自己一路講野,一路 present 出o黎咁解。自從學左 [ 狗荒 ] 輸入法後,就幾乎腦唸同 present 同步喇。

多謝錯愛。

eric 說...

8x至9x年代既愚樂圈,好似冇咁誇張。不過又可能暗啞底攪好多野(以前冇乜狗仔隊爆陰毒)。

卡臣 說...

係呀!
以前50,60年代, 明星真係一粒星!
可能民風純樸,
而家啲讀者睇雜誌
只想睇到明星仆街拆墮
幸災樂禍.
憎人富貴之心, 路人皆見

ps 古巨基冧d豬妹fans, 好cute啊基仔!
好乖仔啊基仔!

匿名 說...

古巨基...本來唔講唔覺,其實又係好似幾難頂。快將四十仲「基仔」? 改叫「基佬」吧。

-不發白日夢的人

eric 說...

阿"基仔"都幾慘既,扮後生固然肉酸,扮成熟佢個樣/聲又欠說服力。唔上唔落,都幾尷尬。