近期網誌簡介

2010年3月9日星期二

(完整版) 富貴「星期二中女」QQ陳莉敏 38歲整容30次永遠80後

( 所有圖片可 click 看大圖 )




Queenie樣靚有錢算係筍盤, Queenie話:「其實我食大排檔都冇所謂,錢唔係最重要,溝通到就得啦!」 caption_pure: "Queenie樣靚有錢算係筍盤, Queenie話:「其實我食大排檔都冇所謂,錢唔係最重要,溝通到就得啦!」"

整 上 癮

《星期二》中女 Queenie 整容 30次搵佬

2010年03月10日 FACE 雜誌 報導

上週《星期二檔案》的〈中女告白〉收視 20點有近 130萬人收睇,其中 Queenie(陳莉敏)樣索仲似有啲貨,班港男即想應徵做兵仔。

自稱恨拍拖的 38歲 Queenie, 95年選過港姐,同屆冠軍係楊婉儀。本刊直踩富貴中女 2,500呎西貢香閨, Queenie直認整容:「我冇數過整過幾多次,計埋有 20、 30次,我整就唔怕認!」家陣佢只在週刊寫美容專欄,冇正職卻住月租 7萬獨立屋,佢話:「好多人以為我俾人包,我都想,你有冇介紹呀!」

眼大、鼻高、面尖尖嘅 38歲 Queenie喺《星期二檔案》接受訪問時自稱:「以前我會同朋友講細幾歲,家覺得好幼稚……人生送你三個字『豪畀你』,我覺得豪畀你嘅時候好有型!」電視一出街網友激讚之餘,仲話佢係中女極品爭住要識佢。



上圖:加工前

95年 Queenie(前排左一)參加港姐。當時只係箍咗牙未整容,拍埋冠軍楊婉儀(紅圈)唔差好遠啫。《蘋果日報》圖片



「整得容唔怕認」

Queenie參選 95年港姐輸畀楊婉儀後,曾做過空姐同 model,不過最威係佢喺 Yahoo blog「老娘的內衣」內分享整容心得兼講吓扮靚,長期係熱門搜尋 blog頭幾位, 06年開 blog至今已經有過 500萬人瀏覽,仲帶挈佢上埋《星期二》做訪問,整容整到咁 open, Queenie亦老實話:「我整得容就唔怕,我 02年幫報紙寫美容專欄,唔試過又點介紹畀讀者,其實好多人都有整容又唔敢認,我認我貪靚所以整容,我最難受試過俾人話我係整容怪,不過冇所謂,出嚟靚自己開心就得啦!」



人工樣
Queenie親自試唔同整容技術兼自拍埋,不過 Queenie話:「一定要靚先得 o架!」





雷射瘦腳
除咗打 Botox, Queenie仲試過用雷射針插入小腿,將部分神經微爆,令腳肌萎縮,愛靚乜都敢試。

打 Botox有風險



家庭醫生關嘉美表示:「透明質酸瘦面對身體無害, 6個月後就會被人體吸收要重打,只要跟醫生指示同自己接受就 ok,不過打 Botox(肉毒桿菌)瘦小腿就會有風險,可能令小腿萎縮,令雙腿冇力,所以一定要聽專業醫生意見先得!」

7 萬蚊租屋

不過 Queenie年屆 38仍單身,一個人住市值 2,200萬嘅西貢清水灣 2,500呎獨立屋,每月租金最少 7皮嘢,又要整容又扮靚,單靠寫專欄條數好難計,對於收入與開支唔相稱,拍過 5次拖,試過被自己好友搶仔的 Queenie說:「咁多年我起碼用咗 100萬整容,不過好多係贊助,好多人以為我俾人包,我都想有呀,你有冇介紹呀!係人都想有依靠,我唔想強求,我又唔擔心,反正我有能力照顧自己,主要收入都係投資股票,邊隻就唔好講嘞!」 Queenie講嘢夠直接, open中女確又係冇乜好呃你喎!

針筒變擺設


Queenie將打完透明質酸嘅空針筒做擺設,她說:「大部分係我响整容診所攞番嚟 D.I.Y.做擺設,美容行業太唔環保,我咪廢物利用囉!」

豪晒 2,200萬獨立屋

Queenie一個人住 2,500呎獨立屋,睇落好似用唔着,不過佢話:「我寫書、寫 blog同拍片都喺間屋度,其實工作咁辛苦都係想有個安樂窩啫!」不過呢種安樂幾奢侈囉!



Queenie衣帽間有過千條飾物,雖然佢年屆 38,不過扮 80後擺 cutie甫士一樣唔難頂喎!


勁晒冷
Queenie睡房喺二樓,佢將部分化妝及護膚用品大晒冷放上床,不過佢話只係佔佢收藏一半都冇,女人貪靚都幾得人驚。

扮靚竇
超級貪靚嘅 Queenie,將佢個浴室變成扮靚竇,佢個 3呎櫃桶擺滿化妝品同護膚用品,仲要多到即時送咗幾塊 mask畀女攝記,氹到佢鬼咁歡喜!

潮大廳
近千呎白色大廳,最搶眼係中間張 Phatom Chair(箭嘴)。據潮鋪 Aluminum老闆 Danny表示:「呢張凳係 80年代至潮產品,當時都要 3,000幾蚊,家仲停埋產,算係古董啦,好值得收藏。」

扮 DJ
Queenie於大廳旁邊放滿打碟機,佢話:「我唔去 disco,又鍾意 disco音樂,得閒會玩捽碟過吓癮!」

鋼廚房
除咗美容, Queenie最愛煮兩味,所以佢將廚房包晒不銹鋼好鬼型,淨係個廚房已經有 300至 400呎,大過好多公屋。





地產女 Yoko:多男仔想識我


節目中另一位受訪者 33歲、做地產 sales的 Yoko雖然個樣冇 Queenie咁索,不過佢自稱有三層樓揸手,兼一句:「我會令下一個男朋友成為世界上最幸福嘅男人。」令到班網友狂加分,不過 Yoko好低調,佢只肯透過電話話:「總之我喺施生(中原地產及利嘉閣老闆施永青)旗下打工啦,自從節目播出後,真係多咗男仔想識我,其實我唔係想做宣傳 o架,只係想分享中女對愛情嘅睇法,唔想大家誤會。」

片尾曲係罐頭

〈中女告白〉片尾曲唔少網友狂話好聽,其實係英國音樂製作公司 Carlin創作嘅〈 Something's in the way of our love〉,已經俾無綫買斷咗版權,所以出面搵唔到 o架!

17 則留言:

小瓶子 說...

哈哈...加下好多男人想学陈振聪, 可以少奋斗二十年.

shell 說...

一個咁普通無內函既節目都可以制造咁多話題都算好野

一首普通到唔普通既英文歌又話好聽到爆, 唉, 香港人....

陳大文部落 說...

哈哈...加下好多男人想学陈振聪, 可以少奋斗二十年.


...............?

陳大文部落 說...

shell:

但最抵死嘅係,呢首歌「已由 TVB 買斷版權」喎,足以證明 TVB 真係一個大台,有 $$$ 乜都得喇。

其實我覺得果首歌叫做 ok 幾好聽,外界覺得非常好聽,相信好大原因,係襯埋個節目,尤其是中女對白,出來嘅效果好有 mood 咁囉。

小必理痛 說...

睇星期二檔案,Queenie有D似馮寶寶後生時嘅樣。

其實整容都係想令到自己靚,吸引到人或增加自信,只要唔後悔就得。

匿名 說...

為了靚, 佢竟然可以令小腿腳肌萎縮?!
真係大犧牲! 佢再老d, 身體機能退化,下肢關節會好多問題...

陳大文部落 說...

{Queenie仲試過用雷射針插入小腿,將部分神經微爆...}


聽落好似好恐怖,「神經微爆」,咁會唔會令肉體感覺退減,即係會唔會減少感覺?

被人打係咪唔會再感覺到痛呢?

好不安...

匿名 說...

點解我覺得佢有d似 喻可欣

匿名 說...

其實Queenie都好可悲,單從報導我覺得佢o既價值觀已經扭曲,佢應該係港女o既始祖。

38歲整容30次永遠80後,到佢58歲就算整容100次我估都唔會似80後啦!到時佢都仲係對住啲Botox, Mask, 大屋...我覺得呢啲先叫做窮。

Joe

能能 說...

我一直覺得這位『姿整』瘋狂者個樣好人工化,那應該是從她在明週book b寫醫學美容開始,其實那時都覺得她有點誇張個樣好『膠』,況且現世代如果妳天生吾係樣子太「騎呢」有適當保養護膚(吾係指打botox整容之類)三十零歲真係應該就係好似佢而家個樣差不多,根本吾洗搞咁多野!可能佢有的家底或有叔叔照起,如果一個女子炒股票炒到住西貢獨立屋,我諗全港股民根本吾洗邊開工炒股,那時西獨立一定爆晒棚...
好明顯另一位葉脆脆都係炒股、整容起家.

匿名 說...

她像吸毒一樣,整容美容上了癮,其他女人就像新加入的癮君子,繼續上癮,悲。


箭豬 說...

希望大文既blog一直保持咁精彩既水準~

讚好!!

皇子 說...

關嘉美醫生張相太驚嚇, 請縮小。

我同意能能所講, 38, 保養好好的話都不會差太遠, 我覺得重會自然D。

匿名 說...

車....我公司個掃把,結埋婚生埋仔放工仲要做家務,都係三十到尾,真係個樣身形吾會差得過呢位整容大姑!您們吾覺得佢的皮膚好怪咩?油淋淋咁!隻眼又帶埋大眼仔,個樣真係好【膠】喎!

allison Choi 說...

價值觀已經扭曲晒...佢好慘..要佢一夜間輸晒d錢去琉浪先幫到佢...

匿名 說...

個Queenie正就一定唔正,只係有錢一樣就可以加分

Something's in the way of our love就唔覺好聽,TVB要飽佢,沒有興趣聽

匿名 說...

QUEENIE個樣好『膠』,好恐怖